Frauen im Hallenbad  von Eduard Sachsenmeyer

Dass Fraun un Männor gewisse Undorschiede offweisn - so im Allgemeinen - das is ja nu hinlänglisch bekannd. Abor ooch beim Badn - e Undorschied wie Feuor un Wassor!

Dabei meene isch jedzde nisch das äußere Bild, was Männor un Fraun abgehm dun. Obwohl nadiehrlisch ooch da Welden dazwischen lieschn! Einen scheen Mann dud bekanndlisch nischd endstelln, ooch e Bauch nisch! Bei de Fraun is das nisch so. Ab fuffzn Kilo Übergewischd wirds broblemadisch! Ma ganz zu schweischn von allzuviele Jahre, die se offm Buckl hamm. Nee, mansche Fraun sin fiehr de männlische Phanthasie werglisch nisch mehr sehr befruchtend! Un mansche söllde im Bad statt Badeanzuch een Tauchoranzuch anziehn.

Abor was isch eischendlisch meene, die Fraun, wennse nisch alleene sin, dun sisch im Bad benemm, wie wennse keen Eintritt bezahld ham, sondorn als wie wennse das ganze Bad für sisch alleeene gemieded häddn. Also, ab zwee Fraun fiehrn die sisch im Schwimmbeckn off, wie de spanische Armada in dor Schlachd von Kaddegatt. In vollor Breidseite durschpflüschn die das Beckn, ohne Rücksischd off annre Schwimmor.

Gud, die Fraun missn ja unendweeschd schwatzn midenandor - da hammse ja keen Zeid, off annre offzubassn! Un wennse ihror Dridd sin oder gar zu Viert odor Finfd... - die genaue Zahl spielt letztlisch keene Rolle! - ...kannsde bloß noch abtauchn, wenn die in geschlossner Formation vor dir offtauchn dun.

Indressand is nu abor werglisch, dass denen dor Redestoff nie ausgehd! Die komm rein in das Bad un dun redn. Je mehr Fraun, desto laudor! Un dann dud dor Redeschwall eenfach nisch vorsieschn. Un wenn die zwee Stundn hin- un herschwimm dun!

Bei eenor geschlossenen Vierorkedde, zum Beischbiel, da kannsde dann ooch bruchstickhaft  heern, was die redn dun. Weil, wenn die zwee Außnschwimmorinnen, sisch am Gespräch bedeilischn wolln, dann missn die ja ganz scheen brilln*!

Bausn im Geschwädz dun eischendlisch bloß dann entstehn, wenn die eene odor annre ma bißl Wasser schluggd un nach Lufd schnabbn muss. Bei eenor Finforkedde allordings, da kanns bassiern, dass wenn eene absäufd, dass das dann gar nisch offfälld. Rein ehm vom Lärmpegel her.

Wenn die Fraun schließlisch im Rudl vom Beckn in den Wirrlbuhl übersiedeln dun, dann kenn alle die, die im Beckn bißl schwimm wolln, offadmen un losbaddeln. Abor den Wirrlbuhl kennse vorgessn! Da hockn die drinne mid eenor Ausdauor, wie de Kreetn im Dümpl un dun schwatzn bis uldimo!

De Männor schwimm vorbissn ihre Bahnen, ohne ooch nur een Muggs von sisch zu gähm! Dor Blick is nach vorn in de Fludn gerischded! Heeschdens, dasse ma ganz kurz een Kontrollblick werfen, wenn eene Frau alleene am Becknrand offtauchn dud. Es kennde ja sein, dass die sisch einsam fiehld un Hilfe brauch!

sächsisch: Das Brillen; die Brille; Gebrill