Hidzewelle

Na, das war doch ma was! Eene Hidzewelle vom Feinsten! Mid heeßor Lufd direkt aus dor Sahara. Imbort aus Algerien, Marokko un Tunesien, so die Ecke. Da hamse werglisch ma nisch am falschn Ende gespard. Sommerhidze wie es sisch für Sommor geheerd.

Wobei ehm - de Weltmarktbreise für heeße Lufd sin momendan dodal am Bodn. Isch gloobe, die Lieferung von heeßor Lufd had sisch für die Arabor ohm in Afrika nisch gelohnd. Teuer is ja immor alles das, was Mangelware is. Was es bloß ganz seltn gehm dud. Gold zum Beispiel, odor Diamandn odor Indelligenz!

Bei Erdöl duds ja immor bißl schwankn, was de Seldnheid bedriffd. Mor merkd das an dor Dankstelle - von eim Daach offn andern is Öl um e baar Cents seldnor gewordn. Noff midm Breis! Am nächstn Daach hamse wahrscheinlisch widdor neues Öl entdeckt - villeischd irschendwo in Schiena. Runnor midm Breis!

Nee, heeße Lufd is konstand nisch seldn. Ooch hierzulande, wo normalorweise heeße Lufd in dor Nadur nisch so ofd vorkomm dud, hasde e Überangebot. Was da alleene ausm Bundesdaach rausströhm dud, un daderzu die Landdaache allor Bundesländor. Un ooch de Gewerkschafdn darf mor bei heeßor Lufd nisch vorgessn!

De greeßde Emmissionsquelle scheind abor momendan de EU zu sein. Das eurobäische Barlamend in Brüssl broduzierd vorgleischsweise das dobbelde an heeße Lufd wie alle Braunkohlnkrafdwerke zusamm C-Oh-zwei ausstoßn dun!

Isch gloobe, dor globale Handel mid heeßor Lufd muss ganz neu organisierd wern.

Mor muss ja ooch off dor annorn Seide an de kalde Lufd denkn. De Klimaerwärmung machd vor dor Lufd nisch hald! Wer heeße Lufd absonderd un in de Atmosphäre busded, muss was fiehr de Kälde dun. Abkühlung dor Beziehungen zu Russland is daderbei ja bloß e Troppn offn heeßn Steen! Mir brauchn endlisch widdor kaldn Kriesch!

Tja, un wenn widdor rischdisch kaldor Kriesch is, dann ham die Arabor ooch eene Changse, ihre heeße Lufd aus dor Sahara gewinnbringend zu vorkoofn.

Klar - das missn die dann nadierhlisch annersch machn, als wie vorsche Woche. De heeße Lufd eenfach so übers Middlmeer blasn, bringd nischd! Die missdn die heeße Lufd schon irschendwie in große Gasspeischor lachorn un dann bei Nachfrache über große Rohre - 'Beibleins!' wie dor Fachmann sachd - zu uns hierher bumben. Ja, so wie das mid dem Erdgas leefd! Fernwärme aus dor Sahara!

Villeischd kennde da ooch Grieschnland einsteischn - also, ins Heeßlufdgeschäfd. Was jedenfalls de grieschische Bolletik bedriffd, da scheind eene eschde Heeßlufdlachorstätte zu schlummorn in Athen. Womeeschlisch direkt unnor dor Akrobolis! Wennse die anzabfn däden, kenndn se villeischd noch e baar Jahre mid heeßor Lufd ieborwindorn - de Grieschn!

Nee, was so eene Hidzewelle doch für gude Ideen hervorrufn dud! Hä?

Meine Gudste meend allordings, isch hädde bei der Hidzewelle e bißl zuviel heeße Lufd abgegrischd.

Eduard Sachsenmeyer