Fehlkonsdrugsjon

Dor Mensch is irschendwie eene Fehlkonsdrugsjon - ehrlisch! Daderbei will isch jedzde ma gahr nisch an de Angela un ihre Bande in Berlin denkn, nee... abor ibrischens, Hexen sinn ja im finsdorn Middlaldor offm sogenanndn Scheiderhaufn vorbrand wordn. Wemmor jedzde de Angela un ihre Bande bedrachdn dud, da krischd der Begriff "Scheidorhaufn" eene ganz annre Bedeudung, hä?

Nascha, abor isch wollde nisch ibor de Regierung memoriern, sondorn ibor den Mensch an sisch. Un der is werglisch eene Fehlkonsdrugsjon. Isch will da ma jedzde ooch nisch an mein Gardnnachbar denkn... das is villeischd e Blinsndieschl! Als wo isch dem unsre madischn Falläbbl iborn Zaun geschmissn hab, had der die offgesammld un endsorschd - un had sisch gewunnord, daß von seim Bflaumboom Äbbl runnorgefalln sin. Nee, so e Blinsndieschl!

Nascha, abor ooch sonsd is dor Mensch an sisch eene gladde Fehlkonsdrugsjon. Un da kann isch misch selbor nisch ausklammorn. Dor Mensch is ja schon fiehrs normale alldäschlische Lähm bloß sehr noddürfdisch ausgerüsded. Wennor viel rumloofn dud, krischdor Blasn an de Füße, wennor viel saufn dud, krischdor een Kador im Kobb un off Dauor eene Wambe. Eene Bierwambe - un wird so zu einem Wambier! Nee, Schbaß beiseide - un wenn sisch dor Mensch viel ärschorn dud, krischdor weiße Haare odor Gladze un een Herzinfaggd. Un so könnde isch noch viele Beischbiele offzähln, woderdran sisch de Unvollkommenheid vom Mensch erkenn lässd.

Abor ibrischens - ooch wennsde disch aus dem alldäschlischn Lähm weidesdgehend raushaldn dusd un bloß noch schdille in irschendeenor Egge hoggsd - du wirsd immor äldor! Un immor schdeifor. Un immor runzlischor...

Nee, dor menschlische Körbor is nisch fiehrs Äldorwern geeischned. Solange der Körbor jung is, da is alles in Buddor! Abor jeds Jahr wird de Buddor e bißl mehr ranzisch. Das dud gahr nisch gleisch offfalln. Dor Verfall dud so dahinschleischn. Das is wie mid Fleesch - bledzlisch bisde angegammeld. Da kommsde nisch mehr ausm Bedde frieh, weil dirs im Kreuze zwaggn dud. Schbädor komm dann die Jahre, wo de froh bisd, wenn dir früh das Kreuze zwaggn dud. Daderdran dusde nähmlisch merkn, dasde noch lebsd. Wennsde offweggn dädesd un dir däde nischd zwaggn, dann kennde es sein, daß de schon dod bisd. So sachd mei Schkadkumbl, der schonn e baar Jahre in Rende is.

Nee, bei mir isses noch nisch ganz so weid - isch bin noch in der Fase, wo isch misch ärschorn du, wenns mir frieh zwaggn dud. Weil dor Mensch een Fehlkonsdrugsjon is!

Ooch die Unnorscheidung in Männlein un Weiblein... völlisch üborflüssisch! Der ganze Schdress mid der Vormährung, mid dem Sex un so - Blödsinn! Warum is das nisch wie bei de Bagdehrijen? De Bagdehrijen vormährn sisch ooch ohne Sex wie de Karniggl! Un das bis ins hohe Aldor hinnein! Nee, dor Mensch is Ausschuss! Abor bei wem soll mor das nu reklamiern? An liehm Godd gloom mor ja nisch mehr!       

Eduard Sachsenmeyer