Biedädlos!

Das dud zu weid gehn! Ährlisch - das is Sinde, wenn nisch sogahr Ärbsinde! Bennziehn aus Hobfn! Isch wollds ooch nisch gloom - aus Hobfn!!!

Isch meene, dasse den Rabs zu Bennziehn odor zu Diesl machn, dadorgeeschn kammor nisch viel einwendn. Ob nu aus Rabs Öl wern dud odor Bennziehn beziehungsweise Diesl... - das is ja werglisch gehubbd wie geschbrung! Fier de menschlische Kähle - so wie so - absolud ungeeischned! Odor hamm Sie schonma Rabsöl gesoffn? Genau!

Heeschdens zum Bradn odor zum Baggn odor fiern Sallad... - nee, dasse den Rabs jedzde so raffinierd raffiniern dun, dass Bennziehn odor Diesl draus wern dud, dageeschn kammor von dor Warde dor menschlischn Biedäd nischd einwendn. Ooch was Kardoffln bedreffn dud... odor Zuggorriehm odor annre Dierkadavor... - das kannsde ja alles noch irschendwie dolloriern, wennse Bennziehn draus machn. Hingeeschn bei wenn ooch Hobfn zu Bennziehn vormosded wern dud odor zu Diesl... - das dud dann doch werglisch de Biedäd iborschdeischn! Da kennse ja gleisch Bier in de Audos neinkibbn! Na, is doch wahr!

Ja, dann dädn nisch mähr bloß de Fahror mid Bierfahne fahrn, sondorn ooch de Audos selbor! Dann däds bei de Audos nisch mähr nach Bferdeschdärkn gehn, sondorn nach dor Bromille. Da dädsde dir dei Audo dadernach aussuchn un koofn, welsches Audo am meisdn vordrachn kann. Mid eim Dreiliddoraudo kommsde dann beschdimmd nisch weid. Das däde dir schon an dor Dankschdelle umkibbn... odor sisch üborgehm.

Guhd, wennde dei Audo mid Bier bedankn dun müssdesd, häddesde een Vordeel - du hasd fiern Durschd immor eene Nodreserve dabei. E langor Schdrohhalm un dann kannsde dir im Nodfall e bißl was ausm Dank fier de Kähle rauszuhdschn. Off dor annorn Seide kanns dir dann abor ooch bassiern, dass disch dor Durschd ibormannen dud un du dusd dei Audo leerzuhdschn, bevors du in dor Nähe von eenor Dankschdelle bisd! Dann mußde loofn.

Wobei - wennsde dei Audo leerzuhdschn dädesd - das is villeischd gahr nisch so schlimm. Irschendwo is ja immor eene Kneibe in dor Nähe is. Klar, da kannsde dir ja dann dei Audo an dor Kneibe nachfilln! De Kneibn hamm ja dann villeischd ooch alle eene Bierleidung naus ins Freie? Womeeschlisch...

Wobei - off dor annorn Seide... wennsch mir vorschdelln due, isch sidze im meim Audo un muss zuguggn, wie mei Audo Liddor um Liddor von dähm edlen Gerschdnsafd durschn Ausbuff jachn dud... nee, das däde isch dem nisch gönnen! Isch gloobe, da däde bei mir doch dor Neid sieschn.

Nee, Bennziehn aus Hobfn... - da däde am Ende Hobfn un Malz vorlorn sein!  Nee, als däde es nisch noch annre Gewächse gähm, die mor zu Bennziehn vormosdn kennde? Solln ses doch ma mid Dee vorsuchn, Bfefforminzdee zum Beischbiel! Odor ... das weiße Zeusch, was de Kiehe absondorn... - ja, Milsch! Weeschn mir! Abor aus Hobfn, das däde mir nisch bloß in dor diefsdn Seele weh - nee, ooch in dor Kähle!

Eduard Sachsenmeyer