Auding

Nee, isch dus nu ooch nisch mehr längor aushaldn - isch muss mei Gewissn endlisch endschlaggn un befrein. Isch gebs jedzde offn zu: Ja, isch habb ooch gedohbd!

Ja, isch bin ooch so eene Misdsau gewähsn! So e Dunischguhd! Abor im Herzn immor guhdmüdisch! Un isch wills ooch nie widdor machn. Nie wiedor dohm!

So, nu isses raus! Hammse ma bidde e Daschnduch, dass isch mir de Drähn abwischn kann?

Danke scheen!

Ach, un isch fiehle misch jedzde ooch gleisch viel wohlor in meinor Haud! Es is wie, wenn eene Zweezendnorlasd... also, wie wenn meine Gudste von mir runnor gerollord is. Isch fiehle misch leischd, wie e Vochl. Isch kennde dursch de Lüfde veeschln...  äh, flieschn un daderzu laud drällorn! So isses mir jedzde!

Nee, Sie solldn sisch ooch endlisch ma audn. Saubore Vorhäldnisse herschdelln! Riggkehr in den Zuschdand dor Unschuld! Ja, so e Auding is sowas von wohlduend fürs Gewissn!

Na, irschendwas wern Sie doch ooch offn Kerbholz hamm, wodorvon Sie sich audn kenn!

Sie missn ja nisch unbedingd gedohbd hamm! Wenn Sie in dor Wirdschafd beschäfdischd sinn... - na, irschendeene kleene Korrubdsjohn wern Sie doch vorzabbd hamm! Odor Steuerhindorziehung? Allordings - je greeßor die Scheiße is, die Sie gebaud hamm, desdo bessor is das fiehrs Auding! Un grade wenn Sie in dor Wirdschafd sinn... odor sogahr im Bauwesn!

Odor wenn Sie irschendwo in eenor Vorwaldung rumhäng... odor Sie sinn Schdaadsbeamdor... irschendeene Rodlischdaffähre wird sich doch findn, in die Sie ma vorwiggld warn! Odor wenn Sie Handwerkor sinn... da dun Sie doch jedn Daach de Leude bescheißn!

Nee, Sie missn bloß ma e bißl rumwühln in den Undiefn von ihrm Gewissn, da dun Sie mid Sischorheid irschendwas findn, womid Sie sich ooch ma audn kenn. Nodfalls duds ja ooch e brivador Seidnschbrung. Odor Sie dun zugehm, dass Sie schon immor lesbisch warn!

Sie missn bloß wolln! Un - Sie solldn sisch sowas Scheenes werglisch nisch endgehn lassn - Auding! Guggn Se doch bloß de Radbrofis an - wie die alle schdrahln dun, nachdem se sisch geauded hamm! Odor Wowowelle un Wesdorreid! Odor ooch de Leichdadlehdn, die jedzde nachziehn dun... Sie missn ehm bloß offbassn, dass das, was Sie audn dun, schon vorjährd is. Nisch dasses Ihnen direggd ans Geld gehn dud! Das wär nadührlisch sehr dähmlisch!

Nee, zum Beischbiel - wo isch damals gedohbd hab, das is ja vor drei Jahrn gewähsn - wo meine Gudste vorgessn hadde, Bier einzukoofn, un isch mußde dann, weil Feiordaach war, in de Dankschdelle fahrn, um mir e Bier zu holn. Da habbsch damals gedohbd wie e Rohrschbadz! Heimlisch. Un nach drei Jahrn kannsch das jedzde ehm ruisch zugehm, ohne dass greeßore Schdrafn von Seidn meinor Gudstn zu befirschdn sinn.                                 

Eduard Sachsenmeyer