E Schaddn offm Weihnachdsfesd
Jedes Jahr im galdn Windor
feiorn Alde un ooch Kindor
voll Besinnlischkeid e Fesd,
welsches alle ziehmlisch schdressd,
doch off das sisch alle frein.
Hinnorhähr dud man berein -
weil mor widdor zuviel schlemmde.
Iborm Bauch da schbannd das Hemde.
Dann gabs widdor de Geschänke.
Die vorschwindn dief in Schränke,
weil die eischendlisch nischd nidzn -
Soggn, Schlibse, Buhdelmidzn...
had mor ja schon dudzendweise!
Das ganze Fesd is werglisch sch...een!
Nur im Kern isses obszeen!
Schließlisch gibbds de Weihnachd nur
weil aus dor Bibel man erfuhr,
dass e Kindlein ward geboren,
in Bedlehem mid kalde Ohren.
Es lach dord in dor Fuddorgribbe.
Das Eldornbaar - mor schdelld sich vor -
das knied so seelisch fromm davor.
Dor Josef beißd sisch off de Libbe.
Sollor rumdohm, sollor schweischn??
Der Säuschling dud ihm gar nisch gleischn!
Doch dann denkdor sisch ganz schlau,
- lass nur machn deine Frau!
Im Schdall schdand noch e Esldier.
Un ooch Schafe - Schdiggor vier!
De Maria froh un heidor
is noch Jungfrau un so weidor.
Doch wie wurde sie ne Muddor?
Sie sachd - alles is in Buddor,
denn dor Vador sei - heerd heerd! -
was dähn Josef ooch mid ährd -
dor liebe Herrgodd heeschsd bersehnlisch!
Da brummd Josef dann vorsehnlisch:
"Das Jesuskind, wie scheen, ach Goddl!"
Josef war e aldor Droddl
un bloß froh, dass - mussor schdärben -
er nun hadde einen Ährben.
Dor Josef druch de Hörnor schdolz.
Die warn ja göddlisch, nisch aus Holz!.
Wischdisch war, das Kind gesund
dad das Zeuschungswundor kund.
Ooch drei Kenische, die kamen,
gloobdn das mid Goddes Samen,
druchn dann in alle Weld
de Nachrischd, dass e neior Held,
dor Heiland nu geboren sei.
Un so endschdand de chrisdlische Bardei.
Heide CS- odor CDU.
Doch am Anfang schdand e Schmuh.
De Maria, jede Wedde! -
lach mid irschendwähm im Bedde
bloß nisch nie mid Godd, dähm Herrn!
Godd häld sisch von Weiborn fern.
Dähr hadde seid dor Schöbfung keene.
Nie war dähr zwischn Frauenbeene.
Währ sowas unsorm Herrn andischded,
dähr geheerd gleisch hingerischded!
Godd - dähr mid Maria bennd?
Godd mid so eim "wann Neid Schdend"?
Nee, das kann doch niemals sein!
Dadrum fälld drodz Kerznschein
off das Weihnachdsfesd e Schaddn:
Mir feiorn dähn Bedruch am Gaddn!
Keine Kommentare:
Kommentar veröffentlichen